واحد من الأسئلة لي كيتطرحو عليا بزاف هو “وليد كيفاش نتعلم الإنجليزية؟” أو “كنعرف القواعد و ماكنعرفش نتكلم” أو “بيغت نتعلم و ماعرفت مين نبدا” … و غيرها من الأسئلة، لهذا هاد النهار غنتكلمو على كيفاش تتعلم الإنجليزية عن طريق يوتيوب + بعض القنوات لي غايعاونوك، بالترتيب، نبداو؟ على بركة الله.
ضروري نفهمو اولا ان يوتيوب ماشي غير موقع للترفيه، و لكن هو غادي معاك على حسب أشنو باغي نتا، حيت إيلا بغيتي ضيع وقتك غايعاونك ضيعو، ويلا بغيتي تتعلم شي حاجة غادي يعاونك تتعلمها، نتا و دماغك.
ثانيا، إذا كنتي قريتي الإنجليزية فالمدرسة و ماعاقل على والو ماشي مشكل، أنا من هادوك لي كانو كيجيبو نقطة مزيانة فالإمتحانات د الإنجليزية و ملي يهضر معايا شي واحد نبقا نشوف فالسما هههه
القنوات لي عاونوني باش نتعلم و لي غانقدم ليك كاملين بالإنجليزية… ستنا ماتخلعش ههه عارفك دابا شنو كتقول فراسك “ولكن أ وليد كيغندير نتبع وانا أصلا ماكنفهمش…” متافق معاك و لكن شكون قالك ماغتفهمش؟ أولا كاين واحد cc تحت الفيديو، كليك عليها و غاطلعليك الكتابة باش تبع معاه، الحاجة التانية، مول القناة فاتحها باش يعلم المبتدئين عليهاش كيهضر بشوية و كيوضح كلامو باش تفهمو، مزيان؟ مزيان.
من الأفضل إذا كنت كتفهم واخا غير شوية، الكتابة تحت الفيديو حتى هي تكون بالإنجليزية، مافهمتش شي حاجة؟ ماشي مشكل، دخل للمترجم د غوغل و كتبها تما، يمكن فيها شوية د تامارا ولكن هانية حيت المصطلحات الجداد غادين يتحفرو فدماغك، كيفاش؟
كتسمع كلمة جديدة، كتشوف كيفاش كتكتب، كتعاود تكتبها ف غوغل ، كتعرف المعنى المباشر ديالها و منين كتنزل شوية تحت كتلقا معاني آخرين ديالها، غالبا واحد من المعاني كيكون هو لي سمعتي فالفيديو.
ملي نولي نعرف مجموعة د الكلمات نقدر تما نبدا نقلب بالإنجليزية بحال هاكا:
“word X” meaning
How to use the “word X”
مانقلكش إذا استعملتي الكلمة فشي جملة صافي نتا هو باهم . ماباقاش غاتنساليك.
عاود قرا هاد الفقرة مزيان، عاودتي؟ مزيان دابا كمل. غانقدمليك القنوات بالترتيب:
Here are the YouTube channels that helped me to learn English:
(مافهمتيش شي كلمة؟ بلا مانوصيك)
كيف تتعلم الإنجليزية عن طريق يوتيوب – 7 قنوات لمساعدتك
Learn English with EnglishClass101.com
قناة من مجموعة ديال القنوات ديال تعليم اللغات
أي لغة جديدة كنبدا التعلم ديالها ضروري ندوز عندهم.
حيت كاين بزاف د الفيديوات لمختلف المستويات:
Absolute beginner
Beginner
Intermediate
Advanced
هذا الرابط ديال القناة
JamesESL English Lessons (engVid)
ملي تحس براسك خرجتي من مرحلة الطفل الرضيع هههه تقدر دوز عند السي جيمس ، شفتي السبورة ياك؟ ماتخافش ماشي داك الأستاذ لي فبالك كنضمنليك. هاهو الرابط.
Learn English with Papa Teach Me
تبع الترتيب ? اذا جيتي عندو و مافهمتيش ماشي مشكل، رجع عند لخرين و حتى تتمكن و كمل
مازال كنتفرج ليه لدابا ، ديما و باقي غنتعلم منو حوايج جداد هاهو الرابط
Rachel’s English
باش لقيت هاد القناة بزاف د الحوايج تبدلو، منهم ديك الإعاقة ديال النطق لي جبناها من المدرسة هههه، ريتشل عندها بزاف د الدروس لي غايعاونوك باش تتخطى هاد المشكل، مايحتاجش نذكرك راه خاصك الممارسة , هاهو الرابط
English Jade – Learn English (engVid)
هدي قناة بحال ديال جيمس، غير هي أسلوبها مختلف، و هي من بريطانيا، هاد شي لي كيعجبني فهاد القنوات كل واحد بأسلوبه الخاص, هاهو الرابط
Jade Joddle – Speak Well
هدي القناة ديال جيد لي هضرنا عليها قبل
Learn English With Let’s Talk
هنا غاتفهم شحال من حاجة لي غاتعاونك فرحلة التعلم
Link
اذا بغيتي تتفرج فيديوات فمجالات مختلفة كنصحك ب تيد عندهم محاضرات من مختلف أنحاء العالم و بالعديد من اللغات
هاهو الرابط
صافي مزيان غانبقا عاصر على هاد الفيديوات نهار كامل ووو….
لا! و إياك، أنه تقرا 4 ساعات و موراها تنعس سيمانة و تستنا تتعلم، راك غير كاضيع وقتك هكذا، قليل و مدوام و لا كتير و مقطوع، كيف قالو ناس زمان، اذا جلستي مركز و قريتي 15~30 دقيقة كل يوم راه الخير و البركة، تخيل راسك من بعد فين غاتكون.
ماذا بعد ذلك؟ What’s next?
النوعية د الفيديوات لي كيعجبك تتفرج فيهم غاتلقاهم بالإنجليزية، سواء كانت الرياضة، الطبخ، الكوميديا… غير قلب عليهم و غاتلقاهم.
حاجة أخرى لي بغيتك دير هي تقرا هاد الموضوع فيه بزاف ديال الناس من دول مختلفة و لغات مختلفة كيحكيو تجاربهم مع الإنجليزية، بطبيعة الحال كاينين مغاربة، و بغيتك شي نهار تولي منهم، و تصيفطلي تجربتك باش نضيفها فالموضوع وغانكون فرحان، متافقين؟
نهارك مبروك!
Oualid Cheddadi is a language enthusiast who created Lingualid with the mission to inspire independent language learners worldwide, regardless of the language they are learning. The name “Lingualid” is derived from the Portuguese word for “language,” “língua,” and the last three letters of Oualid’s name, “Lid.”
شكرا جزيلا وليد
Valuable content Oualid. Thumbs up.
Good job oualid