كيف تتعلم أي لغة بشكل بسيط و ممتع - (بالدارجة المغربية)

السلام عليكم خوتي اليوم بغيت نهضر ليكم على كيفاش نتعلمو اللغات بشكل بسيط و ممتع 😉

(English version of this post,Language Learning tips ,in the link below)
#كيفاش نتعلم اللغات؟

بعدا شنو هي أول حاجة ندير ؟
أول حاجة نقرا على هاد اللغة نعرف تاريخها ، علاقتها مع باقي اللغات و گاع المعلومات عليها ، شفتو بحال ملي كتعجبك شي وحدة و كاتبقى تقلب موراها ؟ إيوا بحال هكا ?

نرجعو لموضوعنا ، هنا غادي تبدا تبغيها ، و مع الحب غاتنسى القسوحية (grammaire و داك شي ) و غاتولي اسهل بالنسبة ليك ?

مثلا نتا باغي تعلم الإسبانية غاتلقى بلي عندها كلمات مشتركة أو متشابهة مع لغات بحال الفرنسية ، الإنجليزية و حتا العربية مثلا (azúcar ,sucre , sugar ,السكر)

حاول تستفد من هاد النقطة وتوضفها لصالحك ، بهاد الطريقة تقدر تزيد بزاف بزاف ديال العبارات للمعجم ديالك ? وبطبيعة الحال غاتزاد الثقة ديالك فراسك ✌

مور هاد شي تعلم الكلمات الأكثر استعمالا (الصفات ،الأسماء، الأفعال..)
تعلمهم فالجمل ماشي بوحدهم باش تعرف حتى البنية ديال الجملة و ترتيب فعل-فاعل-مفعول
بالنسبة للتصريف conjugaison فالأول نتعلم “أنا” و “أنت” فالحاضر present باش نقدر ندير محادثة بسيطة
ماخصناش نهضرو على الناس من أول مرة ياك ?

آپري نتعلم الماضي و المستقبل القريب ، و بشوية بشوية نتعلم الباقي على قد حاجتي ?

دابا كنعرف الأساسيات ، خاصني نبدا نطبق ، نحاول نتواصل مع المتحدثين ديال هاد اللغة ، نستعمل المجموعات ديال Language Exchange اللي فالفيسبوك ، و كاين تطبيقات بحال Hello Talk , الرابط غنديرو التحت .
الفكرة ديال هاد الشي بسيطة هي أنه نتا باغي تعلم مثلا الإنجليزية ، كاتلاقا بواحد باغي يتعلم العربية و كايتحدث الإنجليزية ?

ملي تكون كاتهضر حاول ماتگولش (ما كنعرفش) خلي Google traduction مفتوح باش تقلب على الكلمة اللي ماعرفتيش ، فنفس الوقت سمع للنطق ديالها ، مع الوقت غاتعلم بزاف د المصطلحات اللي كايتستخدمو يوميا

تصنت للبودكاست بديك اللغة شحال ما قدرتي ، دير فراسك بلي أهم حاجة هي نقدر نتواصل مع الناس ، و هادي بالتأكيد كاتجي من بعد مانفهم آش تايقولو .

كانستعمل واحد التطبيق سميتو Innovative ، فيه بزاف د اللغات ، كاتعلم بالسمع ، هاهو الرابط

بس: كايعطيوك أسبوع مجاني تستافد من كل الميزات ، و لكن هادي عام وانا مازال كنستعملو ? كيفاش ، فديك السيمانة تيليشارجيت تقريبا 2Go ديال audio&video و بقيت كنستعملها عادي ??

هذا الرابط ديال القناة ديالهم فيوتوب (الفرنسية) ملي غادخلو تلقاو القنوات ديال اللغات لخرين ?

Hello Talk :
Link